القائمة الرئيسية

الصفحات

تطور الذكاء الاصطناعي


تخيل نفسك فاتح/ة الموبايل وجمبك اصحابك وبتتكلم عن انك عايز تشتري موبايل جديد والشباب مختلفين في انك تشتري تلفون معين هواوي وناس لا تلفون معين لسامسونج

فجأة واحد قدر يقنعك في القعده ، واداك خيارات انك تشتري حسب ميزانيتك ووراك كل واحد بتميز عن التاني بشنو وهلي الخيار ليك حسب رغبتك واستخدامك

رجعت البيت مبسووط انه الموصوع بقي ساهل عليك وبكرة ان شاء الله طوالي الخطة علي السوق عشان تشتري وشبخ خلاص اخترت

وانت في عز الروقان والانبساطة رقدت في السرير قلت تتصل علي كم محل وتسألهم من الاسعار وتشوف الرخيص وين ، وفعلا تم

خلصت المكالمة وقفلت وقلت كدي اخش افتح النت واشوف الحاصل شنو

وهوووووب هوووووب

اعلانات كتيرة ظهرت ليك فجأة للتلفونات القالها ليك صاحبك 😲

بسم الله ده ما التلفون القالوا لي صاحبي ⁦‼️⁩

طيب ديل التلفونات السألت عن اسعارها 😲⁦⁉️⁩

ياربي صدفة ⁦
بسم الله الرحمن الرحيم

كيف اكون اتكلمت عن الموضوع وفجأة القي اعلانات لنفس الموضوع ⁦⁉️⁩😲

اهدأ وروق والاجابة ماصدفة

طيب كيف الحصل والحيصل اكتر ؟! ركز/ي في الجاي

خلبنا نقول اول حاجة انه في بصمة صوتية الباحثين والعلماء والمطورين شغالين عليها من سنين طويلة وهي مايعرف بال Audio Fingerprinting والهي بتعتمد كانت علي تكثيف الاشارات صوتية معينة وبياخدوه خصائص صوتية من الصوت وبتم التحليل

طبعا عندها استخدمات كتيرة ومختلفة تحت مسميات عديدة

تم التطوير كتير جدا

بصمة الصوت دي بتعتمد علي واجهة برمجية AudioContext API ودي العليها كل التطوير والابحاث مستمرة حاليا

واحد من الاستخدمات

انها بتخلي المواقع الالكترونية انها تقدر تجمع بيانات عبر المتصفحات زي قوقل كرووم ، سفاري ، فايرفوكس الخ

الداتا المجمعة دي بتنقسم لنوعين
بيانات خاصة بالجهاز وبيانات خاصة بيك

بيانات الجهاز فيها نوع الجهاز الانت مستخدمه ، نوع المايكروفون ، نوع السماعات الفي الجهاز او مكبرات الصوت (الاسبيكر)

البيانات الخاصة بيك انت/ي

فيها الاصوات الحول الجهاز 😲
المتعلقة بيك انت/ي او الناس المحيطة بيك حسب ما تم نشر من دراسات

هاااات مويه باردة ياولد خلي الزول/ة يبرد شوية

اشرب اشرب/ي
ما حتروي الليلة

الداتا دي كلها بتجمع وبتسجل وبحصل ليها عملية تحليل عبر الذكاء الاصطناعي حديثا عشان تدي بصمة قوية ليك تقدر المواقع تحدد بيها انت منووو فعليا ويكون عندك سجل تعريفي معين حسب بياناتك وكمان تقدر تعرف هويتك ومع استخدام الذكاء الاصطناعي الموضوع بطلع مستوي جدا وتقدر المواقع تستهدفك حسب بصمتك الصوتية زي ماهي عايزة

كل الداتا دي بتتباع للشركات المعلنة مع تصفحك للمواقع والهيستوري بتاعك وزياراتك في الانترنت وزي ماقلنا طبعا كل ده بتم بعد التحليل والف سلام وتحية علي الخصوصية وطبعا التحايل كتير من الشركات في الخصوصية

عموما تقدر تقول انه الداتا دي عبارة عن بترول القرن ال 21 وقيمتها لا تقدر بمليارات الدولارات

موضوع الناس بتتكلم في حاجة وفجاة بعد ايام او وقت معين تلقي كل الاعلانات والاقتراحات في نفس الموضوع الكنت بتحكي عنه مقرتح او معلن وظاهر ليك


author-img
السلام عليكم ورحمة الله الاسم: خالد بدرالدين مصطفي. سوداني الجنسية مقيم بالخرطوم. العمر :22 سنة. فرلانسر من 5 سنوات , التدوين مجرد هوائية.ويتيوبر مبتدء

تعليقات

الفهرس